2ª xuntanza dos clubs de lectura polo Nadal

 Aproveitando as vacacións de Nadal e o tempo de lecer que terá o alumnado, as distintas coordinadoras dos clubs foron reuníndoos na última semana de clases para recoller as impresións das primeiras lecturas e ofrecer os novos títulos que comentarán á volta.

Lidia, a coordinadora do club de lectura de 1º da ESO, xuntouse co seu alumnado na Biblioteca e alí fíxolles entrega duns agasallos moi especiais. Cada un dos membros do club tiña un paquete onde dentro se atopaba un libro personalizado, escollido entre os distintos exemplares dos que dispón a biblioteca do centro e atendendo á enquisa que cubriran ao comezo sobre os seus gustos lectores.

Quedaron encantados cos seus agasallos lectores, escollidos por Lidia con todo o cariño. 

A coordinadora do club de 2º da ESO, Raquel, tamén recolleu as impresións sobre os exemplares de "Sonríe" e aproveitou para entregarlle ao seu alumnado o novo exemplar: a obra "Invisible" de Eloy Moreno que eles e elas escolleran previamente por votación entre distintas escollas. 

Ana Cruz, coordinadora do club de lectura de 3º da ESO, reuniuse co seu alumnado para valorar como levaban a lectura de "Nací para esto" e, vendo que moitos e moitas aínda non foran quen de rematalo, decidiron volver a verse no 2024 para comentalo unha vez que o finalizasen nas vacacións do Nadal. 

Aproveitou a xuntanza e as datas para convidalos a un biscoito que agradeceron enormemente.

Por último, a coordinadora do club de lectura de 4º da ESO, Susana, reuniuse co alumado do seu club para comentar a obra "Habitación 202" e entregar a nova lectura: a novela negra xuvenil "A malferida". 

Acolleron esta obra con moito interese por engancharse a esta historia a quen a sinopse non deixa indiferente.

Todos os clubs de lectura quedaron en ler os exemplares que se lles ofreceron e en verse a comezos do ano que vén con toda a ilusión e ganas por descubrir as novas historias que os están agardando!

Visita do alumnado do club á exposición de Castelao!

 O alumnado dos distintos clubs de lectura do instituto acudiu ata o Auditorio Municipal de Vilanova para coñecer máis a fondo a figura dun dos autores máis importantes da cultura galega do século XX: Alfonso Daniel Rodríguez Castelao. 

Aínda que moitos deles e delas non coñecían nada desta figura tan emblemática da tradición cultural galega aproveitaron a ocasión para aprender algúns datos que lles contou a profe de lingua galega, e coordinadora do club, Raquel.

Despois, visitaron libremente a exposición e foron fixándose nalgúns dos aspectos máis característicos do estilo artístico de Castelao.

2ª xuntanza do "Apadriñamento lector" en Nadal!

 A segunda das xuntanzas do proxecto intercentros do "Apadriñamento lector" tivo lugar na escola de Aralde, tal e como quedaramos no Magosto.

Ata alí desprazouse o noso alumnado para contarlles dous contos aos nenos e nenas. 

As obras escollidas foron "Cando Martiño tivo ganas de mexar na noite de Reis" e "A que sabe a lúa?".

Para preparar a contada tiveron un obradoiro impartido por Noemí González, mestra nunha Casa Niño (A Raíz, en Xunqueira de Espadañedo), quen se prestou a vir ao noso centro para explicarnos as singularidades das contadas para nenos. 

Con ela, o noso alumnado aprendeu moitísimas técnicas que despois, nos ensaios, puxeron en práctica para que o día da visita a Aralde lles saíse todo o mellor posible. 

O noso alumnado desfrutou moito levando a cabo esta actividade, mais cremos que os nenos e nenas do cole tamén o fixeron como público. 

Despois da contada dos maiores, os pequenos e pequenas sorprenderon ao noso alumnado tamén cunha contada, axudados pola súa profe, e acabaron a xornada xogando no parque e desfrutando deste fermoso vínculo que se está a crear entre eles e elas. 

Coma sempre, despedíronse con moito pesar, pero coa esperanza de seguir realizando actividades para un dos proxectos máis bonitos que se fixeron no centro.

Novembro é o mes da ciencia en galego!

 O club de lectura de 1º da ESO tivo unha sesión do club moi especial.

Como estaban a ler o libro "A proba de auga" aproveitaron para que Nadia, profe de Bioloxía do centro e coordinadora do club de lectura de adultos, lles explicase algunhas cuestións científicas que se tratan na obra para axudalos a entender mellor toda a complexidade que un libro aparentemente sinxelo podía ter.

 

En coordinación coa Biblioteca e o Equipo de Normalización Lingüística foi un bo xeito de celebrar que novembro é o mes no que se conmemora o uso do galego nas ciencias. 

1ª Reunión do Club de Lectura de 4º da ESO con Susana

 A primeira reunión do club de lectura de 4º da ESO coa súa coordinadora Susana realizouse na biblioteca do centro.

A lectura escollida para iniciar a nova andaina literaria foi a obra "Habitación 202" de Concha Blanco.

Quedaron en verse nunhas semanas para compartir impresións sobre este libro de relatos. 

E tamén aproveitaron a xuntanza para falar de gustos lectores e ir escollendo cal será o seguinte libro.

 

1ª xuntanza do "Apadriñamento lector" polo Magosto!

Coincidindo coa celebración do Magosto no IES Faro das Lúas levamos a cabo a primeira das xuntanzas do proxecto intercentros do "Apadriñamento lector". 

O noso alumnado participante no proxecto, xunto con outro alumnado do EDLG, axudou a preparar unha xornada inesquecible para os nenos e nenas do cole de Aralde. 

Invitáronos a unha merenda e elaboraron un circuito de xogos tradicionais para que puidesen xogar cos seus padriños e madriñas e se divertisen coa experiencia. 

O encontro entre os padriños e madriñas e os seus afillados/as foi moi emotivo. 

Desde o primeiro momento creáronse uns vínculos moi especiais entre cada parella.

A partir dese primeiro encontro pasaron un par de horas xuntos, onde o noso alumnado fixo de guía ensinándolles o centro, explicándolles como se xogaba a cada un dos xogos e merendando e coñecéndose mutuamente.

Custou que se despediran, pero fixérono coa promesa de que o noso alumnado acudiría en Nadal a súa escola para coñecela e contarlles uns contos! Xa o están desexando!

1ª Reunión do Club de Lectura de 3º da ESO con Ana Cruz

 A primeira das xuntanzas do club de lectura de 3º da ESO coa súa coordinadora Ana Cruz non puido ser máis especial!

A coordinadora levou ao seu grupo ata a librería local Nobel Vilanova para que eles e elas escolleran por consenso, e atendendo ás recomendacións das libreiras, cal sería a lectura coa que empezarían a súa andaina neste curso 23/24. 

Finalmente, a escollida foi "Nací para esto" de Alice Oseman, unha autora moi querida e lida entre o noso alumnado por ser a creadora do éxito "Heartstopper".

Na ligazón de abaixo podedes ver un vídeo resumo desta interesantísima actividade: 

Visita do club de lectura de 3º á Librería Nobel

1ª Reunión do Club de Lectura de 2º da ESO con Raquel

 A primeira reunión do club de 2º da ESO coa súa coordinadora Raquel foi un tanto diferente. 

Con este grupo, ademais de realizar as pertinentes xuntanzas lectoras acordouse colaborar co Equipo de Dinamización Lingüística do centro para realizar un apadriñamento lector coa veciña Escola de Aralde.

 

A primeira fase deste fermoso proxecto intercentros pasou porque o alumnado deste club enviase cartas describíndose e explicando cales son os seus gustos e afeccións. 

Os pequenos e pequenas da escola responderon a estas cartas cunhas postais preciosas onde escollían madriña ou padriño e realizábanlles uns debuxos imaxinando como poderían ser fisicamente. 

Ademais, aproveitouse para repartir a primeira lectura do curso, o cómic "Sonríe" de Raina Telgemeier

Quedamos en vernos nunhas semanas para falar da lectura e preparar o primeiro encontro cos seus afillados e afilladas dentro do proxecto intercentros!

1ª Reunión do Club de Lectura de 1º da ESO con Lidia

 O alumnado do Club de Lectura de 1º da ESO reuniuse coa súa coordinadora Lidia para recoller a súa primeira lectura do curso.

O primeiro título que lerán é o cómic "A proba de auga" de Anémona do Río, que o ano pasado tivera unha acollida estupenda.

Ademais, Lidia pasoulles unha batería de preguntas para poder coñecer máis os seus gustos lectores e atinar coas vindeiras recomendacións. 

Quedaron en verse nunhas semanas coa lectura feita para poder falar de todo o que lles pareceu!

Arrinca o Club de Lectura do curso 23/24!

O Club de Lectura do IES Faro das Lúas non deixa de medrar e podemos dicir que neste curso, 2023-2024, temos máis alumnado desexoso de participar nel ca nunca! 

Nas reunións de coordinación previas, decidimos dividir ao alumnado interesado en participar no club por niveis, para axeitar as lecturas aos seus gustos e intereses, e establecemos quen dos membros do equipo de Biblioteca levaría cada un dos clubs, quedando o reparto do seguinte xeito: O Club de Lectura de 1º da ESO levarao Lidia, o Club de lectura de 2º da ESO farao Raquel, do Club de Lectura de 3º da ESO encargarase Ana Cruz e do Club de Lectura de 4º da ESO será Susana quen o coordine. Ademais, manterase o exitoso Club de Lectura de adultos capitaneado por Nadia. Aproveitamos para acordar cales poderían ser as primeiras lecturas mentres non renovásemos o catálogo deste curso e quedamos en comezar canto antes coas reunións de presentación. 

 Agardamos con moita gana un novo curso de lecturas e xuntanzas!

Recollida do premio Atrévete!

 A primeira andaina do club de lectura deste ano foi unha extensión co curso pasado, pois chamáronnos para que tres das alumnas do noso centro fosen recoller o premio "Atrévete a ter unha idea" a Santiago.

O proxecto gañador saíu do club de lectura, pois con alumnas e alumnos de 1º e 2º da ESO do curso 22/23 participamos no proxecto "Atrévete" para fomentar o espírito creativo e innovador no noso alumnado. 

Aroa, Celia e Uxía recolleron o premio por ter unha idea innovadora, neste caso relacionada coa lectura. 

O seu proxecto "Childrens book's" buscaba crear un sitio web onde os menores de idade puidesen autopublicar as súas obras sen necesidade de solicitar permisos aos adultos. 

Queremos darlles de novo os parabéns, polo premio acadado, por representarnos como parte do club de lectura e por ser rapazas con tantas inquietudes que, coa súa creatividade e capacidade para ver onde non hai, consiguen facer do futuro un lugar máis interesante!